玉如阿姨——香港人更多嘅平價台灣牌子
玉如阿姨網上真係超多人講，好多人都話平靚正。
佢哋網上款式超級多，而且佢哋有海外配送，所以都幾受香港人歡迎；
因為連埋運費，都比香港好多內衣brand平。
咁啱去台灣玩，所以我都有上網揀定款打算去舖頭試。
網上同舖頭唔同款
本身我係出發前睇好款先去試，但點知去到職員話我知，
舖頭有嘅款同網上會有啲唔同，
所以我只好喺舖頭再揀。
但佢哋舖頭嘅款其實都係掛到滿牆，所以想要去到慢慢揀都可以。
店舖體驗
我嗰日舖頭超爆多人，仲要全部都係香港人，一個台灣人都無😂
佢哋都係主打全台灣製功能內衣，所以都有類似fitting嘅部分。
因為舖頭實在太忙，未有人得閒理我，所以我坐低等咗一陣。
點知職員嚟俾咗張紙仔我填，話如果我有興趣試嘅都可以寫低編號，佢會準備好俾我入試身室。
試身過程職員會幫手，試身室有髮夾提供算幾貼心，而且試身室好大！
內衣質素就…比想像中差
因為網上有好多讚嘅post，所以我對佢哋期望其實幾高，
但現實就係質素真係比預期嘅差；好多簡單款嘅布料都太挺身，唔太舒服。
因為佢哋主打係功能內衣，我嘅標準都會以功能內衣評價。
老實講，效果都係普通內衣；但同Depic比，我覺得玉如阿姨嘅包覆會好啲，
至少唔會成舊副乳飛出嚟。
但價錢真係同質素成正比，我揀咗幾款都係$150，真係超平。
我最後都係買咗一個頂檔，因為我旅行帶唔夠bra😂
