Intimissimi——意大利隨性性感
呢個意大利品牌好多商場都有，相信唔少女士都有見過。
佢哋嘅形象就係歐洲簡約、隨性、性感，除咗內衣，佢哋都有好多睡衣嘅選擇。
整體感覺會比較成熟，價錢都唔算平價。
香港比較少有嘅風格
（以上為Intimissimi官網截圖）
呢類型多被劃分成法式，其實就係以輕薄罩杯為主，
大部分唔會有太多pad，甚至會有無pad嘅透視蕾絲款。
香港內衣市場多以亞洲品牌為主，呢類型比較大膽、唔太修飾身形嘅接受程度無咁高，
所以Instimissimi算係香港少有嘅風格。
店舖體驗
全間舖淨係得一間fitting room。
如果遇上係weekend，好大機會要等幾耐。
我去嘅時候只有一位職員，而且明顯就係一位sales，
主力都係sell，無辦法解答有關身形嘅問題，
或者按我身形推薦款，都係問我鍾意咩色要唔要有lace。
內衣效果——細胸友好，外觀取勝
佢哋大部分嘅款都係偏薄罩杯，肩帶都係細肩帶為主。
如果你鍾意佢哋風格，佢哋嘅款真係好多可以揀，
而且質地的確比唔少品牌好，外觀絕對過關。
但內衣全部基本無功能，可以見到集中同包覆都唔夠。
如果你胸唔大，有追求自然，又咁啱係鍾意呢個風格，
咁係可以試吓。
但如果你想胸形靚，Intimissimi我覺得就唔需要考慮喇。
想要身形好，都係要搵個有合適功能嘅bra，再配合按摩保養！
私心推薦——睡衣系列
雖然佢哋主打係內衣，但我自己私心覺得佢哋最出色嘅係睡衣！
如果預算充足，佢哋嘅絲質同cashmere睡衣系列都好正！
