Hafina —— 少有嘅自家設計功能內衣
Hafina見佢哋網站已經慶祝咗10週年，係香港少有嘅創辦人自己設計嘅內衣品牌。
創辦人Sorry姐可以話係品牌嘅靈魂人物，更自稱為收副乳專家；可以睇得出副乳係Hafina最主打解決嘅身形問題。
咁Hafina喺功能內衣牌子入面，功力同各方面體驗到底如何呢？
預約前—美容院營銷？
Hafina採取嘅係預約一對一諮詢模式，我喺book之前都有去望吓佢哋嘅website同IG，發現唔太搵到佢哋有嘅款同埋bra嘅價錢。
因為係一對一服務，仲要搵唔到每個product幾錢，其實有少少驚去到會被㩒住嚟劏…
近期見到佢哋嘅廣告，除咗bra之外，好似有豐胸油同保養療程；再望望佢哋website同廣告，真係好似美容院😅
（以上均為Hafina IG截圖）
新奇技術—話可以排乳暈黑色素？
Hafina近期經常提及一個叫Pink Technology嘅布料技術，聲稱可以排出因為摩擦形成嘅乳暈黑色素，同時可以抑菌，仲可以減淡乾紋。
聽落去的確幾吸引，邊個女仔唔想要粉紅色乳暈？但我個人對呢個技術有些許存疑。
我去fitting嘅時候有試到，罩杯裡面嘅布料的確係親膚柔軟。
所以我相信摩擦應該係會比一般嘅bra少，自然就會減少黑色素生成；布料可以抑菌我都覺得應該係真，因為唔係咩新嘢。
但可以排走黑色素就…我無從考究。但我覺得，如果戴個bra就可以做到的話，點仲會有咁多人花咁多錢去做美容療程？🤨
店舖試身室—真係美容院房…
頭先先話覺得佢哋嘅website、廣告同IG都勁似美容院，點知上到去做fitting，真係美容院咁😂
佢哋無講錯，試身室真係好大，好寬敞；但入到去就見到一張床同美容儀器。個feel似美胸療程美容院多過內衣店。全程超驚會俾sales姐姐sell療程package…
（香港女士們都應該明白美容院hard-sell有幾得人驚…）
產品實力—親膚包覆力好嘅bra
佢哋主打嘅技術頭先講過，布料的確親膚，比一般嘅bra柔軟。
佢哋bra款大部分包覆力都好好，基本上真係可以將啲鬼祟肉撥返去胸前，集中力相當唔錯。
可以見到佢哋嘅款都係功能款式，包覆程度比一般bra高好多；
如果真係想改善身形，呢啲款當然就適合，但如果著開一般bra的話，會需要一段時間適應。
因為我覺得佢哋嘅功能款比我之前試過嘅功能款更包，戴唔慣的話可能會覺得有啲拘束。
順帶一提，雖然之前好驚被sell，但店舖職員專業，亦唔算hard-sell。
