Miro —— 舊概念翻新嘅日系港牌？
Miro喺香港內衣市場嚟講，算係最後生嘅一個品牌，係2018年先創立。但呢幾年擴展速度極快‼️
相信唔少女士都可能已經試過，或者有想要去試；主打無鋼圈育胸，仲要無鋼圈就做到，的確符合好多人宜家嘅追求。
宜家就同大家拆解一下呢個算新嘅品牌，到底係何方神聖！
真實背景—到底係咪日本牌子？
Miro應該係香港本地牌子。
品牌嘅logo設計、企劃宣傳、廣告設計等都大量使用日文和日本技術等字眼，所以唔少人可能會認為Miro係日本品牌。
我哋有去官網望過，並無明確嘅相關資料。但喺媒體報導嘅第一篇就係日本雜誌，但雜誌上寫嘅地址係香港荔枝角…?（有係喺日本雜誌買廣告嘅嫌疑）
（此為Miro官網「媒體報導」頁面截圖）
另外品牌主打其中一項「日本專利技術」Biyutech，其實都難以搵到其他嘅相關資料，無從證實技術嘅真正來源。
Miro關於品牌真實嘅背景來源其實比較模糊，好明顯係主打日系功能內衣，但有啲感覺係香港品牌玩文字遊戲？🧐
品牌定位—無鋼圈功能內衣 +日夜育乳
Miro揀嘅定位其實算特別，因為市面上絕大部分嘅功能內衣牌子都係主打有鋼圈嘅bra；但Miro就反其道而行，反而更加打中年輕一代追求輕盈舒適嘅市場。
功能內衣大部分都會話有鋼圈嘅承托會好啲，會快啲見到改善效果；但Miro主張用罩杯嘅獨特設計就可以做到舒適承托，以及修飾贅肉嘅效果。
佢哋嘅「日夜育乳」簡單概括，就係朝早著功能內衣，夜晚著睡眠bra。呢個概念其實唔係新嘢，所以可以話係舊概念嘅重新包裝？
產品實測—包覆度高嘅舒適內衣
講完背景同品牌概念，當然最重要都係啲胸圍得唔得啦！
試咗佢哋幾個款，其實老實講著上身效果都係差唔多；但全部包覆力都相當唔錯，所以集中力喺無鋼圈內衣裡面真係算非常好！（睇吓條事業線就知😎）
因為全部都係無鋼圈，所以舒適度一定比一般功能內衣舒服好多✅
但要提一提就係，款式真係算少；如果你鍾意簡單款，唔太介意個look嘅話，的確都係幾好嘅日常選擇～
店舖環境—私隱度ok但偏細
Miro大部分舖頭都唔太大，但試身室有係舖頭後面位置，所以私隱度都合格！
